Хичнээн тансаг эд байвч хир тоос ямх ямхаар буртаглана
Арчиж баймаар
Хичнээн эрүүл бие заяавч хайнга авир чимх чимхээр доройтуулна
Арчаатай баймаар
Хичнээн их эрдэм суравч сагага зан дусал дуслаар дундруулна
Даруухан баймаар
Хичнээн сайхан сэтгэл байвч хилэнц уур хумхи хумхиар бузарлана
Бясалгаж баймаар

Санаан зоргоор байдаггүй хорвоо доо
Сарвайж чармайж байж босгодог амьдрал даа

Зөв цэгц хүн таардаг даа
Зүтгэл хичээлтэй байж чаддагийнх  байх даа 

Сайхан гэр бүл харагддаг даа
Салаа үгүй сэтгэлээ гагнаж чадсаных байх даа

Амжилт оргилсон байгууллага байдаг даа
Ажил ажилдаа чармайдаг хамт олонтойнх байх даа

Хөгжиж мандсан улс бий дээ 
Хөл гараа жийлцэхгүй нэгдмэл байдгийнх байх даа

Онгон сайхан байгаль байдаг даа
Онгичиж сүйдлүүлэлгүй хадгалж ирснийх байх даа

Санаан зоргоор байдаггүй хорвоо доо
Сарвайж чармайж байж бүтээдэг амьдрал даа

Би-ээс ангижирч Бид-ээс салахуй Ай тэр бас Ашдын хүсэл буюу Бодлын дусал - 2016

Цайлган юм, цайлган юм гэсээр зажилж л орхидог хорвоо шүү. Цааргатай л яваарай үр минь Сайхан юм, сайхан юм гэсээр самарч л орхидог хорвоо шүү. Сагалгүй л яваарай үр минь Номхон юм, номхон юм гэсээр ноолж л орхидог хорвоо шүү Ноцолттой л яваарай үр минь Мундаг юм, мундаг юм гэсээр мунгинуулж л орхидог хорвоо шүү. Муйхаргүй л яваарай үр минь

Ганцаар тунгаан суухад гарцаагүй муугийн шалтгаант үгс

Олноор хуйрнахийн цагт оройлон дуудах уриа болохыг үзвээс

Хором ч зогсолгүй эс арчилбаас эл оюун тархи өөрөө

Хүй мандлыг ч хүйс тэмтрэх их солиорлын эх ундарга мөн тул

Цаг цагийн үнэнд цадалгүй, худалд тунилгүй

Цэгц санааг чанад эрхэмлэн, үргэлжид эрэлхийлж, төвшин суутугай!

Бодлын дусал